الحب اهبل واعمى بس ساعات بيعمل دماغ

الحب شىء جميل جدا فى بدايته أحاسيس جميلة و سعادة و تألق لأقصى حد فى
كل شىء .. الخطوة الثانية إضطرابات فى النوم و عدم رغبة فى الأكل والشرب

تسارع فى ضربات القلب تصاحبها آلام فى المعدة .. و مع تطور الحالة يبدأ

الحب فى مهاجمة مخك و تدريجيا تلاحظ حالة تشتت و بله ملحوظ تبدأ فى

التخييم على مخك و تتجسد فى كل تصرفاتك .. مش عارف تركز و لا حتى تفكر

فى أى شىء خاصة عندما تقابل حبيبك .. تقول كلمتين .. بعدها يطير كل

الكلام .. تحاول التذكر.. مخك رايح جاى .. كلمة ثم صمت ثم لعثمة يعقبها

شرود ثم إنصراف!
إيه إللى أنا باقوله ده ! حاسس إنك عبيط و أكيد حبيبك قال عليك

معتوه .. لكن إطمن .. دى حالة شائعة جدا فى الحب و ناس كتير عانت من

نفس المشكلة و شعرت بنفس الهبل تقوللى ما انا عارف بس المشكلة فى حبيبى


و الفكرة إللى أخدها عنى .. أقولك إهديله أغنية لما بتكون بعيد باحضر
كلام أقوله و أما بتكون قريب بتنسينى اليوم بطوله و لا باعرف أتكلم و يا

دوب كبيرى أسلم .. يا عمرى و الله لما أشوفك بانسى الدنيا دى ، بانسى

الكلام إللى أنا قايله حتى الغرام إللى أنا شايله.. ليتأكد إنك طبيعى و

كل دى مجرد أعراض جانبية للحب عند كل الناس .. لكن هل تعرف سبب التشتت

و النسيان و عدم القدرة على التفكير ، و الهبل الذى تشعر به فى حالة
الوقوع فى الحب؟!

بيقولك إكتشفوا إن الحب يؤثر على نشاط المخ و يقلل القدرة على التفكير

بشكل عام ده غير المناطق التى يصيبها الشلل التام و هى المناطق
المسئولة عن الإنتقاد و التقييمات السلبية حيث تتوقف عن العمل تماما ..

و لهذا قالوا زمان إن الحب أعمى لأننا عندما نحب نرى من نحب أعظم حد فى

الدنيا و خاليين من العيوب..
ده غير تأثيره على المناطق المسئولة عن الذاكرة و التركيز .. عشان كده

لما أبويا يقول فنجان قهوة بأعمله شاى و فى الآخر باديه لأمى .. و

أراهنكوا إن شادية فضلت تصب فى الشاى لحد ما إتدلق من الفنجان على

الصينية على الأرض .. و بيقولك كمان إن الحب له نفس تأثير تعاطى

المخدرات على المخ بعد تصوير المخ بالرنين المغناطيسى حيث لوحظ أن الحب

يؤثر عليها مثل تعاطى المخدرات يعنى لو لاحظت حد مسطول مش ضرورى يكون
ضارب ممكن يكون واخد جرعة حب زيادة..

و أحسنلك بكتير إنك تضرب حب بدل ما تضرب مخدرات على الأقل الحب أوفر و

ألذ و له نفس التأثير و جايز أكثر كمان..
لكن الكارثة إن الأمن يدرج الحب ضمن قائمة الممنوعات و الحب ما يتعرفش

غير بروشته من الطبيب.
و لما تقابل حبيبك بدل ما تقول له الحب الحب .. الشوق الشوق تقول له


إنت أحلى جوينت فى حياتى و لما بشوفك الطاسة بتتعمر كأنى ضربت خلطة
منوعات.


كل هذه التأثيرات أثبتتها عدد كبير من الدراسات التى أجريت فى بريطانيا
و أمريكا.


الخطر الحقيقى إن الحالة تقلب على جنان خاصة عند الناس إللى عايشة
الدور صح و عندها ضمير فى الحب و وصلت لدرجة عدم القدرة على التفكير

و
لنا فى قيس مجنون ليلى خير عبره ، الحب فضل يمسح فى دماغه .. يمسح فى
دماغه لحد ما خلاها أبيض يا ورد..
فى النهاية قدامك طريقين .. الأول إنك تنفض الحب خالص و تحافظ على مخك و


صحتك على أساس إنهم أنفعلك .. الطريق الثانى إنك تحب بجد و تضحى بعقلك
فى سبيل إستمتاعك بالحب.

تصدق أول مره يعجبني راي حد في الحب
بس أنا راي أن الواحد يأجله مثلا لغاية ما يرتبط رسمي ومش حقولك للجواز لأ.... مثلا بعد الخطوبة حب زي ماأنت عايز عالأقل لما الحب يعميك عن عيوب اللي قدامك حتلاقي ألف واحد من أهلك والناس اللي حواليك يفوقوك

كلام جميل بس يا ريت يكون فعليا مش نظريا
ديما كل الناس وخاصة الشباب بيرددوا الكلام ده بس لما حد فيهم بيقع فى حب بجد .....
كل الكلام ده بيكون ملوش معنى عنده !!!
ويقولك دى كانت لحظة عقل وعدت .....؟؟؟؟؟
ويرجع يكرروا تانى بعد الفشل فى علاقتة وتكون دى بالنسباله نهاية حياتة ......